Forskingsprosjekt viser
at hjorten tar halve grasavlinga

FJALER: I område med hardt beitepress frå hjort vert grasavlingane på innmark bort imot halverte. Det viser eit beiteskadeprosjekt som Planteforsk Fureneset fagsenter på Fure har gjennomfører på Lone i Fjaler.

– Skaden er større enn det vi hadde førestilt oss, seier forskar Samson Øpstad.

Lone er eit av samlingsområda for hjort i ytre deler av Fjaler. Trekkvegane går både nord-sør og aust-vest. I tillegg er oppvekstforholda optimale med tett vegetasjon i lett kupert terreng og kort veg ut til meir snøfattige kystområde.

Men beitepresset frå ein stor og kanskje veksande hjortestamme merkast fleire stader både i Fjaler og andre deler av fylket. For tre år sidan oppmoda Vestre Fjaler Bondelag Planteforsk Fureneset fagsenter om å sjå nærmare på problema som hjorten skapar på innmarka.

To prosjekt
– At det er mykje hjort i området er erkjent også av forvaltingsorgana. Arealet som ligg bak kvart fellesløyve er redusert med 75 prosent i høve til normalen, for å få ned hjortestamma, seier Samson Øpstad.

Forsøksprosjekt vart sette i gang for to år sidan, på Radøy i Nordhordland og på Lone. Tidlegare har vore gjort forsøkt på eldre eng, no vart fokus sett på attlegg og 1-årig eng.

På kvar forsøksplass vart to like felt isådde med fem ulike grasartar, for å sjå kva hjorten beitar hardast på og korleis plantene reagerer. Det eine feltet vart stengt for hjort med eit høgt gjerde. Grasveksten har blitt kontrollert om våren, ved 1. slått, 2. slått og om hausten for å sjå verknadene av hjortens beiting.