J.G.Olsen
Jørgen Grundtvig
Olsen
 |
Tretti gonger vitja Grundtvig Olsen Hotel Union og Norangsdalen.
Olsen var bergensgut og ingeniør av yrke, og han arbeidde lenge i Tyskland for det tyske jernbaneselskap, bygde jernbanebruer og stasjonsbygningar. Han gjekk i 1897 inn i Sam Eydes ingeniørteam, planla Østbanestasjonen i Oslo m.m.
Olsen var innpå 2 m lang, litt krylryggja, slank som eit riveskaft, og han røykte krokapipe. Han var alltid velkledd; stivesnipp med "knekk", mansjettar og svart slips, grå dress, gullklokke, og i klokkekjedet hang eit stort lokomotiv av reint gull. Han hadde elles høgdeskrekk, og var livredd for kattar, småbarn og mus.Men kvar gong Olsen kom til bygda, så samla folk seg om han. Han var alltid midtpunktet, morosam og fritt-talande som han var.
Fotograferte:
Denne mannen hadde og ein hobby som bygdafolket sette pris på. Han var etter den tid ein svært god fotograf, som tok mange gode bilde frå naturen og fjella kring Norangsdalen. Mange av desse bilda heng no på ungdomshuset, på hotellet og i mange heimar i bygda.Han var ingen stor fjellklatrar, men har likevel vore opp i dei fleste fjelldalane omkring dalen.
Det var tydeleg at han var glad i bygda. I den tida han var her, gav han mange bøker til bygdeboksamlinga, og etter sin død i slutten av 1940-åra, synte det seg at han hadde testamentert ein sum til utsmykning og vedlikehald av ungdomshuset "Konsul Endresens Minne".