I Nordlandsposten, 6. mai 1999, gir Inge Myrvoll (SV) meg ein moralsk ørefik. Han slår fast: "Det er ingen politisk gruppe i Norge som har mindre rett til å felle moralske dommer over andre enn RV." Deretter blir eg og RV gjort medskyldig i "det stalinistiske terrorregime", "invasjonen i Ungarn" og "Pol Pots folkemord."

Mens USA er nær å føre Noreg i krig med Kina, finn eg lite tid til vrøvl om RV og terrorregime. Men Sovjet sin invasjon i Ungarn i 1956 fortener nokre ord. Dette overfallet på ein suveren stat var hovudgrunnen til at eg aldri vart med i NKP, trass i at eg hadde og har stor sympati for idegrunnlaget til oktoberrevolusjonen. Eg oppfatta historia slik at Sovjet i 1956 utvetydig hadde forlate sosialismen. Kontrarevolusjon, statskapitalisme og imperialistmakt vart høvelege namn på Sovjet. Både AKP og RV vart danna ein liten mannsalder seinare med kamp mot Sovjetimperialismen som politisk hjørnestein.

Noreg er i krig, som angripar. Det første offeret er sanninga. Alt og alle blir svart eller kvitt, djevlar eller gudar. I krig kan ein aldri lese planar og siktemål av ord og proklamasjonar. Orda er våpen. Måla må ein lese av handlingane. (Skulle ein halde seg til orda, var Nazi-Tyskland sin okkupasjon av Noreg ein venleg verneaksjon – mot britisk imperialisme!)

Offisielt har USA (og NATO-marionettane) gått til angrep på Jugoslavia for å stø kampen til albanarane i Kosovo mot serbisk vald, drap, terror og etnisk reinsing. I Aftenposten 8. mai seier NATO-sjef Solana: "NATO har aldri, og vil aldri, med vilje angripe sivile. Vi tar særskilte forholdsregler for å unngå skade på annet enn legitime militære mål."

Den 7. mai meldte Aftenposten at NATO hadde bomba eit sjukehus og ein marknadsplass i Nis (tredje største byen i Jugoslavia). Var det eit militært sjukehus og ein våpenmarknad?

Natt til 8. mai bomba NATO den kinesiske ambassaden i sentrum av Beograd, residensen til den kinesiske ambassadøren og eit av dei største hotella i Beograd, forutan nokre TV- og radiostasjonar. "Der Spiegel" og "Dagens Næringsliv" skriv 9. og 10. mai at bombinga av ambassaden ikkje var nokon pilottabbe. Piloten slapp den 500 kilos bomba si frå B2-flyet presist etter ordren frå CIA! Feilen låg hos CIA. CIA hadde "trudd at bygningen var eit statleg forsyningslager". Er det nokon som kan spandere eit turistkart over Beograd på CIA, slik at bombeplanleggarane kan sjå kor ambassadane ligg?

Den 9. mai meldte Aftenposten at NATO (eller var det CIA?) hadde utvida den diplomatiske krigen. Natta før hadde dei gitt det greske konsulatet i Nis ein kilevink. Det var ikkje folk i huset, men huset stod for nær ei bru som NATO måtte fjerne. Det er truleg heilt tilfeldig at Kina er den staten i verda som har vore mest kritisk til NATO-bombinga i Jugoslavia, mens Hellas er mest kritisk i Europa.

Anar Inge Myrvoll at han og SV med stemmegjevinga si i Stortinget kan vere medskyldig i ein stor imperialistisk krig, leia av USA og CIA, og ført i namnet til NATO? Kanskje bør namneskifte til Sosialimperialistisk Venstreparti bli vurdert? Eller skifte i krigspolitikk?

Tjøtta, den 10. mai 1999.

Einar Jetne

Fylkestingsrepresentant for RV